صوفیانلی آزاده محمد پار
رضا همراز
آذربایجانین معارفی و آزادلیغی حاقدا قدم آتانلارین بیریسی ده صوفیانلی محمد پار اولموشدور . تاسف له بو ایتگین فدائی حاقدا گونوموزه قدر بیر سطیر اولسوندا بوگونه کیمی گوزومه دیمه میشدیر . بیر حالدا کی او واختیندا اوزونه گوره آدلی – سانلی بیر شخص ایمیش . بو ایتگین ، صداقتلی و نجابتلی فدائی نین آدین بئله خاطیرلاماق اولار .
آدی : محمد
سوی آدی : پار
سیجیل نومره سی : 10189
صادر اولونان یئر : صوفیان
آتاسی نین آدی : اکبر
آناسی نین آدی : نازی خانیم
سواد : لاتینجه
پئشه : مکانیک لیک
دوغوم تاریخی : 1287
اولوم تاریخی : 28/10/1368
مزاری : صوفیانین اسکی قبرستانیندا . آنجاق سونرالار اوغلانلارینین همتی ایله بوگون صوفیان پارکی کیمی آدلانان یئره انتقال تاپمیشدیر .
بو صداقتلی انسان اوزو ال ایلن ایشله دیگینه رغماً ، ایشچی طایفاسینا چوخلو حورمت ائدیب ، ایشچی لر یولوندا بیر نئچه دونه اوز جانین خطره ده سالمیشدیر . دوزلوک له عومرون باشا وئرن محمد پارین ایش لرینه گوز اولان میللی حوکومت آدلاملاری اونو 21 آذر مدالینا لایق گوروب ، بو دیرلی مکافاتا قهرمانی تلطیف ائتمیشلر . اونون الده اولان محدود یازیلاریندان نه درجه ده پاک یاشامینا ال آپارماق بیر اوقدر ده چتین دئییل . آشاغیداکی اوندان قالان بیر سند داها مسئله نی آیدین لاشدیریر . باخین لطفاً :
16/4/25
آذربایجانین خلق قوشونلارینین بیوک رهبری آقای ژنرال کاویان
نهایت احترامیلن عرض اولونور بنده محمد – پار صوفیان فدائی رهبری ایندیه قدر زحمت چکوب ، خواهش ایدیرم امر مقرر] بویوراسیز[ بنده ایچون بیر جفت چکمه مرحمت ایده لر – محمد پار امضاء
منجه بئلنچی بیر سند لره دونیا مقیاسیندا چوخ نادر صورت ده راستلاشماق اولار کی بیر لیدرین الینده تام امکانات اولا – اولا اوز مافوقوندان بیر جوت چکمه ایسته مه یه اذن آلا .
او کیچیک یاشلاری ایله گنجک لییه قدم قویدوغو ایللری آذربایجانین اوتایندا قاطار سوروجوسو کیمی مشغول اولوب ، سونرالار ایسه ایکینجی دونیا ساواشی اوز وئردیکده آناسی و بیر اوغلو ایله بو اوز دده - بابا یوردونا دونوب بورادا یئنی دن عائله قورماغا موفق اولموشدور . تاسف له او بوتایا دوندوکده حایات یولداشی ایله سارا آدلی قیزی اورادا قالیب عومور – گون لرین باشا وئریرلر . اونون اوغلو بابا دا اوزو ایله بو تایا گلیب مسکونلاشاندان سونرا ایش باشلاییب بیر مدت عراق ، کویت ، قزوین ، تهران و مشهد کیمی شهرلرده ایش له ییب ، نهایت مشهد ده دونیاسین دگیشیب اورادا تورپاغا گئدیر . بابا میللی حوکومت دوورو مکتب شاگیردی اولوب گویا یامان شولوغ بیریسی ایدی . اونون درسی نومره لر یاخشی اولسایدی دا ، آنجاق انضباط نومره سی 10 اولاردی . بودا دودورلرده ، آیری سئچگین لیک اولمامادان حئکایت ائده بیلن بیر ماراقلی قضیه دیر . رحمتلی محمد پارین دوزلویو سبب اولموشدور کی منطقه اهالی سینین خاطیر – حورمتین کسب ائدیب اورادا بیر محبوب چهره کیمی تانینسین .همین چهره 1324-1325 ینجی ایللرده صوفیان و حومه فدائی لری نین رهبری تعیین اولور . بو محبوبیت چوخ چکمه دن چوخلارینین قولاغینا گئدیب چاتیر . آذربایجانین خلق قوشونلارینین وزیری ، ژنرال کاویان بیر مکتوبدا اونا خطاباً بئله یازیر :
آقای محمد پار
صوفیاندان کلیه و صوفیاندان آجی کورپی سنه قدر دمیر یول مسئولیتی کلاً و جزاً سیزه تاپیشیریلیر . لازمدور فوری قایدیب الی نفر فدائی تحت اختیاریزه آلاندان صونرا لازمی اقدامات عمله گتیره سن و مرتباً عملیاتیزین نتیجه سینی خلق قوشونلار وزارتنه گزارش اتمکله لازمی دستورلار آلاسیز . ضمناً بیر نفر تعلیماتچی افسر گونده ریلدی البته فدائیلری مرتب تعلیمات کچرمکه وادار ایده سیز که بیر آزمدتده بیر منظم قوشون صورتنه سالاسیز .
خلق قوشونلار وزیری – ژنرال کاویان
میللی حوکومت دئوریلدیکده اودا شاه مامورلاری طرفینده یاخالانیر . نه ایسه دولت و ملت طرفیندن شاکی تاپیلمادیغیندان سونرا نظامی مستشارلار اونو ایکی ایل زندانا محکوم ائدیب ، 15 گون مرند ده ، 6 آی تبریزده و باقی حبسین بندر عباس دا کئچیریب باش اوجالیقلا اوز یوردونا دونور . او وطنه دوندوکده یئنه معارف حاقدا آتدیق لاری آتدیم لارین چوخالدیر . رحمتلی پار مکتب لرده قورولان انجمن اولیا و مربیان دا همه شه فعالیت گوسترردی هئچ ، گلیرینین بیر حیصصه سین ایسه مکتب لرین ایرلی گئتمه سینه خرج ائدردی . محمد پار بیر چوخ عومرون صوفیانین گروس آدلی کچ کرخاناسیندا ایش له ییب ائله انقلابدان سونرا ایسه اورادان حداقل حقوق لا تقاعد اولموشدور .
قئیدیات :
بو یازیمیزدا بیزه یاردیمچی اولان مهندس یعقوب آقا پاردان بیر سیرا شفاهی بیلگی لرله ، بیر سیرا آتالارینین سندلرین بیزیم اختیاریمیزدا قویدوقلارینا گوره تشکر ائدیریک .
sizin hamraz...
ما را در سایت sizin hamraz دنبال می کنید
برچسب : صوفیانلی,آزاده,محمد, نویسنده : esalarsolmaz9 بازدید : 273 تاريخ : چهارشنبه 29 شهريور 1396 ساعت: 0:52