درویش بهرام علاف زاده

درویش بهرام علاف زاده

رضا همراز

من رحمتلی درویش بهرام علاف زاده نی ان آزی 32 ایل اولاردی تانیردیم . صاف – صداقت لی بیریسی ایدی . او 1345 ینجی ایل تبریزین شهناز خیاوانینین باشیندا اولان درویش لر محله سینده چوخ اوشاقلی بیر عائله ده آنادان اولموشدور. مکتب واختی چاتینجا آتاسی اونو مکتبه گوندرمیشدیر . آنجاق او درس له ایشی بیر بیرینه هاماش ائدردی . مکتب دن قایداندان سونرا آتاسی نین قنادی توکانیندا اونا یاردیمچی اولاردی . اقتصاد رشته سین باشا چاتدیراندان سونرا کیتابا ماراقلی اولوب ایشی بوراخیب کیتاب آل – وئرینه اوز گتیریر. بو ایللر او شعره داها ماراق گوستریب اوز آنا دیلینده گوزل شعرلرده یازیب ، اما بیریسینه بیر او قدر اوخومازدی . همین ایللر بهرام عرفان و تصوفه کونوللو اولوب اوز محله لرینده خلیفه یدالله نین یانیندا بیر سیرا درویش لیک رسم لرین ده مشق ائدیب ، نهایت قادریه سلسله سینه بیعت الی وئریر . او فقیرانه یاشامیندا هئچ بیر گلایه ائله مه یب ، یالنیز مطالعه ائتمه یه داها آرتیق ماراق گوسترردی . بیری ایله ایشی اولمازدی . سونرالار عائله قوردو . اما کیتابچی لیقدان ال چکمه دی. بئش گون بوندان اول زنگ آچیب کئفین خبرالاندا دئدیم « آقا شیخ یوخ سان ، از گورونورسن ؟ » او رحمتلی ایندی دئمه سین دئدی : »فلانی 11 گون ایدی مریض خانادا یاتمیشدیم . اوره یمه بیر بالاجا عمل ائله یب لر . اما ایندی یاخشی یام » نه یازیق کی دونن 29/8/96 او تهراندا یئنه اوره یی خسته له یب ، النهایت تانری سینین جوار رحمتینه واصل اولور .

رحمتلی درویش بهرام یاخشی دف چالاردی . توکانینا گئدنده هردن کئفی گول ائیله ینده منه دئیردی اوتور . و سونرا دفین گوتوروب عرفانی شعرلری زمزمه ائردی . اونون بیلمیرم نه قدر شعری وار ایدی اما من بیر سیرا سین ائشیتمیشدیم . حتی واختی ایله ارک روزنامه سینه شعر - یازی گوندرنده ، درویش بهرامین دا بیر – ایکی پارچا شعرین گوندریب اورادا نشر اولونموشدو. بو آرزی گوز ، هابئله محجوب دوستوموزا الله تعالی دن رحمت دیله یب ، یئر خوش اولسون دئیب بیر نشر اولونمامیش شعرین تقدیم ائدیرم .

عشق اودوندا یانیری کول اولورو پروانه

هره بیر جور جانینی قوربان ائدیر جانانه

گل گولوم زنجره چک تئللریون تاری نان

چونکو عشقون ائله یب من یازیغی دیوانه

اورورم ساقی سن الله منه سن رحم ائیله

دور گتیر تدزجه ایچیم بیرکی دولو پیمانه

زاهدا تولاناسان گورمک همین بیر خالین

داناسان مدهبیوی آند اولا او قرآنه

شاعیرا عار دئییل سن گزه سن چول باییری

چونکو معبدگه اولوب چول باییر اول صنعانه